Mon06242019

Last update10:02:19 am

Font Size

Profile

Menu Style

Cpanel
Back அறிவுக் களஞ்சியம் பலாக்கொட்டை பொரியல்

பலாக்கொட்டை பொரியல்

  • PDF

'பிள்ளை கடிக்க முடியாமல் கிடக்கு' என்பார் அப்பா. சற்று மொறுகலாகப் பொரித்தால்.

'என்னம்மா சப்பென்று வாய்க்குள் நொளுநொளுக்குது' என்பான் மகன் சற்று முன்னதாகவே எடுத்தால்.

ஆம்! கடிப்பதற்கு நல்ல கடினமாக இருக்கும். ஆனால் சற்று முன்பே எடுத்துக் கொண்டால் மொறுமொறுப்பு இல்லாமல் வந்துவிடும்.

இரண்டையும் தவிர்க்க பலாக்கொட்டைகளை முதலில் சற்று அவித்தெடுத்த பின்பு பொரித்துக் கொண்டால் உள்ளே மாப்பிடியாகவும் இருப்பதுடன், மேலே மொறுமொறுப்பு சேர்ந்ததாகவும் இரண்டு வகை சுவையையும் சேர்ந்து கொடுக்கும்.

வயதானவர்களும் சப்பிச் சாப்பிடக் கூடியதாக இருக்கும்.

தேவையான பொருட்கள்

பலாக்கொட்டை – 15
மிளகாய்ப் பொடி – ¼ ரீஸ்பூன்
விரும்பினால் மஞ்சள் பொடி, பெருங்காயப் பொடி - சிறிதளவு.
உப்பு தேவையான அளவு
பொரிப்பதற்கு எண்ணெய்

செய்முறை

நல்ல கெட்டியான பலாக்கொட்டைகளாகத் தேர்ந்தெடுங்கள். மிகப் புதியதும் சரிப்படாது. நாட்பட்டதும் கூடாது. அவற்றின் மேல்தோலை நீக்கி நீர் விட்டு இரண்டு கொதிவர அவித்து எடுங்கள்.

ஆறிய பின்பு அவற்றை குறுக்கே ஒரு வெட்டு வெட்டி இரண்டாக்கி எடுத்துக் கொள்ளுங்கள்.

எண்ணெயை கொதிக்க வைத்து பொரித்து எடுங்கள். பொன்னிறமாகப் பொரித்து எடுப்பது அவசியம். எண்ணெயை வடிய விட்டு உப்பு மிளகாய் பொடி தூவி விடுங்கள். இம்முறையில் பொரித்த பின் பொடிகள் தூவுவது வித்தியாசமான சுவையைக் கொடுக்கும்.

விரும்பினால் வழமை போன்று பொரிப்பதற்கு முன்பே உப்பு மிளகாய்ப் பொடி, மஞ்சள் பொடி, பெருங்காயப் பொடி பிரட்டிப் பொரித்துக் கொள்ளலாம்.

மாதேவி
http://sinnutasty.blogspot.com/2009/01/blog-post_21.html